Partizani ka dalë nga gara në Ligën e Kampioneve edhe pse dominoi ne ndeshjen e kthimit. Tashmë skuadra do të fokusohet plotësisht te pjesëmarrja në Ligën e Konferencës. Një turne në të cilin shorti i ka vënë përballë një kundërshtar të lehtë në letër.

Përballë do të jetë Atletik D’Eskaldes e Andorrës, e cila u eliminua që në turin paraeliminator të Ligës së Kampioneve dhe shorti e vendosi ndaj të kuqve në turin e dytë të turneut të tretë për nga rëndësia në Europë.

Sipas kalendarit, ndeshja e parë luhet në fushën e skuadrës nga Andorra, “Estadi Comuna;”, ku skuadrat e këtij vendi luajnë sfidat e tyre. Dhe që tani është përcaktuar që ndeshja e parë nuk do të luhet në ditë të enjte, siç zhvillohen zakonisht sfidat e Ligës së Konferencës, por të martën.

Ndaj Partizani do të zbresë në fushë të martën e 25 korrikut, për të luajtur në transfertë ndeshjen e parë ndaj kësaj skuadre, me startin e planifikur në orën 17:00, sipas kalendarit të miratuar nga UEFA.

Mbetet të mësohet nëse edhe ndeshja e kthimit në Tiranë do të respektojë këtë traditë, duke u luajtur në një ditë që zakonisht u rezervohet skuadrave të Ligës së Kampioneve, apo do të kthehet në të enjten tradicionale.