Kjo periudhë pushimi nuk do të shërbejë vetëm për rikuperimin e lojtarëve pas një sezoni të gjatë, por edhe për drejtuesit e Partizanit, të cilët kanë përpara vendime shumë të rëndësishme për të ardhmen e klubit. Fokusin kryesor e merr zgjedhja e trajnerit të ri, ndërsa paralelisht po punohet edhe për merkaton e verës dhe ndërtimin e skuadrës për sezonin e ardhshëm.

Te Partizani ekziston bindja se skuadra ka nevojë për më shumë stabilitet dhe vazhdimësi, sidomos pas një sezoni ku ndryshimet e shumta në pankinë ndikuan ndjeshëm në performancën e ekipit. Për këtë arsye, drejtuesit nuk duan të nxitojnë me vendimin për trajnerin e ri dhe po analizojnë me kujdes çdo alternativë.

Kandidati më i preferuar nga presidenca vazhdon të mbetet Zoran Zekic. Kroati shihet si profili ideal për pankinën e të kuqve, jo vetëm për eksperiencën që ka, por edhe sepse e njeh shumë mirë ambientin e Partizanit dhe presionin që vjen me fanellën e kuqe. Në periudhën kur drejtoi ekipin në vitin 2023, skuadra tregoi stabilitet dhe arriti rezultate pozitive, ndaj emri i tij vazhdon të mbetet i preferuari i drejtuesve.

Megjithatë, rikthimi i Zekic nuk shihet si një operacion i lehtë. Trajneri kroat ka qenë pjesë e Sarajevos sezonin e fundit dhe edhe klubi boshnjak po tenton ta bindë për të vazhduar bashkëpunimin. Pikërisht kjo e mban ende të hapur situatën dhe Partizani nuk ka ende garanci për arritjen e marrëveshjes.

Nga ana tjetër, në klub nuk duan të varen vetëm nga një emër. Drejtuesit po studiojnë edhe alternativa të tjera dhe një nga profilet që po diskutohet është ai i një trajneri portugez. Një lëvizje që shihet si surprizë, pasi deri tani nuk kishte pasur shumë zëra për interesim të tillë.

Ajo që kërkohet mbi të gjitha është një trajner me ide të qarta për lojën dhe ndërtimin e ekipit, por edhe një teknik që di të menaxhojë grupin në momentet e vështira. Sezoni i fundit tregoi qartë se skuadra kishte nevojë për më shumë balancë dhe qetësi në periudhat negative të kampionatit.

Objektivi mbetet i njëjtë: rikthimi i Partizanit në nivelet më të larta të futbollit shqiptar dhe sigurimi i një bilete për në Kupat e Europës. Për tifozët e kuq, vera që po afron pritet të jetë vendimtare për të ardhmen e klubit.