Një gol i Egnatias në minutat shtesë të takimit e ka ndalur Partizanin ne Rrogozhinë, në ndeshjen e javës së 28-të të Superligës.

Kristian Mba i jep një fillim të mirë Partizanit me golin e shënuar në minutën e 22-të të ndeshjes. Ishte ky goli i katërt radhazi për nigerianin. Gjithsesi të kuqtë duhet të kishin shfrytëzuar më mirë rastin për të dyfishuar rezultatin me Hotin në minutën e 31-të.

Pjesa e dytë ka folur për skuadrën vendase, e cila e ka kërkuar me ngulm golin e barazimit, gol që eventualisht ka ardhur në të 92-tën minutë të takimit pasi më parë kishin pasur disa raste të tjera shënimi.

Prononcimi i trajnerit Colella pas takimit:

𝐂𝐨𝐥𝐞𝐥𝐥𝐚: Nuk jam aspak i kënaqur sot. Jam i kënaqur për pikën pasi sipas meje Egnatia edhe mund ta fitonte ndeshjen. Por për pjesën tjetër kam pak për të qenë i kënaqur. Skuadra nuk më pëlqeu sot. Nuk më pëlqeu në pjesën e parë, në të dytën, në shtesë, para e mbrapa. Pikë. Kur jam kështu, nuk di çfarë të them. Nuk më pëlqeu as në pjesën e parë, se mund të shfrytëzonim më mirë 2-3 situata.

1 pikë për titullin kampion?

𝐂𝐨𝐥𝐞𝐥𝐥𝐚: Vlerësimi im nuk është rreth pikës së marrë, pika është mirë, Egnatia bëri një ndeshje të mirë dhe ndeshje të tilla të nivelit të lartë janë gjithmonë të ekuilibruara. Nuk e diskutoj pikën, nuk është se po shkul flokët nga dëshpërimi se nuk fituam.

Mungesa e lojës së bukur?

𝐂𝐨𝐥𝐞𝐥𝐥𝐚: Luajmë futboll, nuk është se kur luan keq humb, e kur luan mirë fiton. Ne luajmë si të jetë e mundur, nuk kemi bërë asgjë, nuk kemi luajtur mirë dhe as nuk fituam. Nuk është e vërtetë që duhet të luash keq për të fituar. Ky është një koncept tërësisht vetëm italian dhe shqiptar, në asnjë vend tjetër të botës.