Ekipi i Partizanit në basketboll për meshkuj do të luajë të shtunën me 8 prill me fillim prej orës 18:00 sfidën e parë kundër skuadrës së Apolonisë së Fierit për të synuar rikthimin në kategorinë superiore të basketbollit shqiptar për sezonin 2023-24, aty ku edhe e ka vendin ekipi me më së shumti trofe në historinë e basketbollit shqiptar.

Ndeshja do të zhvillohet në pallatin e sportit “Flamurtari” në Vlorë, aty ku skuadra fierake zhvillon ndeshjet e saj vendëse.

Të kuqtë e drejtuar nga trajneri Erdal Borova e ka mbyllur kampionatin e Kategorisë së Parë duke u renditur të dytët në klasifikim me 18 pikë (7 fitore në 11 ndeshje), ndërsa skuadra e Apolonisë është renditur në vendin e pestë në Superligën e meshkujve me 27 pikë (7 fitore në 20 ndeshje).

Basketbolli i meshkujve është skuadra e kuqe më e suksesshme me plot 33 tituj kampion dhe 16 trofe të Kupës së Shqipërisë, prandaj pjesëmarrja në Superligë është detyrim.