Trajneri i Partizanit Giovanni Colella është shpallur trajneri më i mirë i muajit Mars nga ana e platformës televizive që transmeton kampionatin shqiptar, “Oversport”.

Tekniku 56-vjeçar ka udhëhequr të kuqtë drejt dy fitoreve dhe një barazimi në ndeshjet e kampionatit përfshirë këtu edhe fitoren në derbin e kryeqytetit.

“Në planin personal është një vlerësim shumë i rëndësishëm, për më tepër pë faktin që e kam marrë në një vend që nuk është i imi. Kjo e bën dyfish më të rëndesishëm”, ka thëne Colella në intervistën për “Oversport” me rastin e pranimit të çmimit.

Kujtojmë se italiani kishte vënë më dyshim qëndrimin e tij në krye te skuadrës së kuqe në fillim të këtij muaji, por insistimi i drejtuesve të skuadrës bëri që ai të qëndrojë. Një vendim që ka rezultuar i drejtë duke qenë se skuadra kryeson kampionatin.