UEFA ka bërë ndarjen në grupe të vogla të skuadrave të kualifikuara për në Ligën e Konferencës dhe Partizani, i cili gjendej në short në vazon kryesore në turin e parë, ka mësuar emrat e 5 kundërshtarëve të mundshëm që do të ketë përballë nesër në orën 14:00 kur të rrotullohen goglat e shortit.

I gjendur në vazon e skuadrave favorite në minigrupin e vet, bashkë me Shkëndijën e Tetovës, Partizani ka kundërshtarë të kalueshëm në teori, por me dy prej tyre që parashikojnë udhëtime të gjata që mund të jenë pak problematike.

Ato janë Saburtalo e Gjeorgjisë dhe Ararat Jerevan e Armenisë, të cilat mund të sjellin probleme sa i përket anës logjistike e udhëtimeve të gjata për zhvillimin e ndeshjeve, por që shohin gjithsesi favorite në teori skuadrën shqiptare.

Një tjetër skuadër në vazon e ekipeve të dobëta të përzgjedhur nga UEFA është Floriana e Maltës, ndërsa të tjerat janë ballkanase. Tuzla e Bosnjë Hercegovinës dhe Deçiçi i Malit të Zi plotëson 5-shen e skuadrave që klubi kryeqytetas do të ketë nesër përballë në shortin e Ligës së Konferencës.