Partizani.Net - Legjenda e futbollit shqiptar

E ardhmja e paqarte, Thaka rri me shpresa, Musta drejt largimit
Postuar nga Eni ne 21.05.2012 13:46

Lajmi i gjate

Ka shumë dilema për të ardhmen e të kuqve të kryeqytetit, ku së pari pritet krijimi i sh.a-së së re dhe dalja në ankand, gjë që vë piketat për sezonin e ri

Partizani i sezonit 2011-2012 e ka mbyllur me sukses misionin e tij, duke u ngjitur në Kategorinë e Parë. Një javë pas përfundimit të kampionatit askush nuk mund të thotë me siguri se cila është e ardhmja e të kuqve të kryeqytetit.

Pas finales së Kategorisë së Dytë, administratori i skuadrës, Gjergji Thaka, pohoi se pas asaj ndeshjeje nuk kishte Partizan, kështu që u mbetet për detyrë dikastereve qeveritare, që të vendosin për të ardhmen e të kuqve.

Prej kohësh është thënë se është bërë gati dosja për regjistrimin e shoqërisë së re aksionare të Partizanit, procedurë të cilën do ta bënte Ministria e Ekonomisë dhe jo e Mbrojtjes. Pas regjistrimit në QKR, u tha se Partizani do të dalë në ankand, ku ekziston interesi për ta blerë skuadrën legjendare.Mësohet se e ardhmja e Partizanit mbahet “peng” nga Ministria e Ekonomisë, qw, ndonëse e ka në tryezë dosjen, nuk e merr nismën për t’i përshpejtuar proceduarat.

Sezoni i ri

Burokracia e institucioneve mund t’i kushtojë shtrenjtë Partizanit, pasi klubi është shumë prapa për të plotësuar kriteret e pjesëmarrjes në sezonin e ri. Është thënë se Partizani i sezonit të ri nuk mund të ecë në gjurmët e skuadrës që sapo mbaroi kampionatin, sepse nuk është kjo rruga, që duhet ndjekur për ringritjen e Partizanit.

Nëse Ministria e Mbrojtjes dhe ajo e Ekonomisë nuk përshpejtojnë procedurat, nuk është çudi që Partizani të mos ekzistojë në edicionin e ardhshëm. Që Partizani të kthehet sa më shpejt në vendin që i takon, duhet të mendojë që tani dhe jo në momentet e fundit, siç është vepruar në 4 sezonet e fundit. Sirenat e alarmit për Partizanin janë dhënë edhe nga FSHF-ja.

Sekretari Eduard Prodani, pas ndeshjes me Këlcyrën, u bëri apel instancave shtetërore që të veprojnë shpejt, pasi skuadra është prapa në plotësimin e kritereve. Ai pohoi se këtë vit nuk do të ketë asnjë lëshim apo falje, pavarësisht emrit që do të ketë klubi.

Për momentin Partizani konsiderohet i shpërbërë dhe askush nuk mund të japë një datë se kur mund të nisë puna dhe kush do të jenë ata që do ta nisin projektin e “demave” të sezonit 2012-2013.

Thaka: Nuk mund te vazhdohet keshtu

Drejtori i klubit, Gjergji Thaka i ka idetë e qarta. Kuptohet që nuk kërkon luks, por që edhe skuadra e tij të trajtohet normalisht, ashtu sikurse kundërshtarët që do të ketë, të cilët kanë një emër shumë më të vogël dhe një histori të papërfillshme përpara asaj të të kuqve, por që po tentojnë ta përmirësojnë.

“Do të vazhdoj të lodhem edhe për 24 orë,– thotë Thaka,– pasi nesër (sot) kam një takim në Ministrinë e Mbrojtjes dhe shpresoj të më japin një përgjigje… atë që unë pres”.

Por çfarë po pret Gjergji i Partizanit, i cili prej kohësh po “copëtohet” gratis?

“E vetmja mundësi është që skuadra të dalë në ankand, pra, me fjalë të tjera, të gjejë një sponsor, ose disa, që për sezonin e ardhshëm skuadra të ketë financa të garantuara, pse jo edhe të pranueshme. Vetëm kështu mund të marrë kuptim emri i madh i Partizanit dhe të tentojë të ringjitet në Superiore. Unë vazhdoj të shpresoj të marr një përgjigje të mirë”.

Në kohën që po prononcohej, Thaka ishte duke ndjekur takimin kualifikues Apolonia – Lushnja. “Mjafton të ndiqni këtë ndeshje dhe e kuptoni që kemi disnivele me një pjesë të mirë të skuadrave që do të jenë në Kategorinë e Parë në sezonin e ardhshëm”.

Sidoqoftë, nëse merr përsipër një ankand, më parë duhet të mbyllësh një gjyq që vazhdon prej kohësh, midis ish-presidentit Xhani dhe Ministrisë së Mbrojtjes. “Unë nuk di të them shumë për këtë çështje, madje as që kam dëshirë të komentoj gjyqe. Por kam dëgjuar që seanca e radhës do të zhvillohet në shtator. Nëse kjo është e vërtetë, atëherë skaudra do të shpërbëhej, pra nuk do të kishte më Partizan”, përfundon komentin e tij, drejtori i klubit, Gjergji Thaka.

Perlat Musta, thuajse i ikur

Nuk ka shumë ditë që është mbyllur kampionati i Kategorisë së Dytë dhe te Partizani ka nisur kaosi. Diçka e tillë pritej, por ka qenë mërzia për humbjen e pësuar në finalen e kampionatit, ndaj Tërbunit, për të përshpejtuar frikën dhe shqetësimet. Në fakt, “demat” e kanë të ardhmen me mjegull dhe nuk dihet se çfarë do të ndodhë me ata, pasi do të vijë shumë shpejt koha e liçensimeve. Por, edhe te stoli do të ketë shumë ndryshime. Perlat Musta, trajneri i të kuqëve, është i pari që do të largohet.

“Objektivi është përmbushur dhe tashmë mund të mendoj dhe të largohem. Isha i detyruar edhe moralisht të drejtoja Partizanin, që për mua do të thotë shumë”. .