Partizani.Net - Legjenda e futbollit shqiptar

Ndeshja me Skraparin zhvendoset ne Kruje
Postuar nga Eni ne 14.05.2010 14:14

Lajmi i gjate

Partizani nuk do të luajë të shtunën ashtu siç ishte parashikuar në “Selman Stërmasi”, por do të zhvendoset në fushën e skuadrës së Kastriotit në Krujë. Një një gjë e tillë është bërë e ditur dje nga drejtuesit e skuadrës së kuqe, të cilët kanë arritur edhe akordin me FSHF-në, duke përfituar edhe nga fakti që skuadra vendase e Kastriotit do të luajë takimin e saj ndaj Shkumbinit në transfertë.

“Kemi vendosur të luajmë në fushën e Krujës, duke qenë se është një fushë me kushte më të mira se ajo e “Selman Stërmasit”, është shprehur shefi i klubit të Partizanit, Bujar Labinoti. Megjithatë një nga arsyet e vërteta të këtij spostimi të skuadrës është edhe eleminimi i pagesës për fushën e “Selman Stërmasit”.

Dihet që mardhëniet mes dy skuadrave dhe drejtuesve të tyre janë të mira dhe pikërisht këto janë shfrytëzuar që Partizani të luajë në Krujë. “I kemi bërë një kërkesë drejtuesve të skuadrës së Krujës, për të zhvilluar ndeshjen që kemi me Skraparin dhe dhe ata nuk e kanë refuzuar. Më pas kemi bërë edhe një kërkesë në FSHF, e cila është miratuar”, ka vazhduar Labinoti.

Ndërkohë, Partizani këtë sezon e ka nisur pikërisht me një ndeshje miqësore ndaj Kastiorit. “Me skuadrën e Kastriotit kemi mardhënie shumë të mira. E kemi nisur këtë sezon futbollistik me një ndeshje miqësore ndaj tyre dhe pse të mos e mbyllim, po me një ndeshje kampionati në këtë qytet”, ka përfunduar Labinoti.

Ndeshja mes Partizanit dhe Skraparit pritej që të ndiqej nga një numër i madh i tifozëve të kuq, në rast se do të zhvillohej në Tiranë. Tifozët i kanë kërkuar skuadrës që të fitojë në ndeshjen ndaj Skraparit, për të lënë këta të fundit jashtë Kategorisë së Parë.

Mungesat
Kur duhen edhe vetëm dy ditë nga ndeshja e fundit e kampionatit me Skraparin, te skuadra e Partizanit mungojnë plot gjashtë lojtarë në stërvitje. Ardit Beqiri prej dy javësh nuk ka qenë pjesë e grupit, për shkak të një dëmtimi. Nga ana e stafit mjekësor ende nuk dihet se kur futbollisti do të rrikthehet sërish në stërvitje. Futbollisti është parë në ambientet e klubit, por jo me qëllimin për t’u stërvitur.

Ne të njëjtat pozita me Beqirin, janë edhe dy futbollistët e tjerë, Sheta dhe Bakalli. Ky i fundit ka ende probleme, megjithatë nuk do të jetë i gatshëm për ndeshjen me Skraparin. Ndërsa Sheta pas një forme të mirë në ndeshjen me Burrelin një javë më parë, gjatë kësaj jave ka zhvilluar stërvitje të diferencuar.

Këta tre futbollistë kanë munguar për shkak dëmtimesh, por janë edhe tre lojtarë të tjerë që nuk dihen arsyet e mungesave të tyre. Dje ka qenë dita e tretë për Bunën, i cili vazhdon të mungojë në stërvitje. Mesfushori durrsak nuk është parë në ambientet e klubit dhe nuk dihet arsyeja e vërtetë e mosstërvitjes së tij. Buna gjatë fazës së dytë të kampionatit, kur është bërë edhe pjesë e Partizanit ka treguar një formë të mirë, duke qenë se për rreth tre javë ai ka qenë i dëmtuar.

Një tjetër mungesë për trajnerin Haxhiu dje, ka qenë edhe Braho. Edhe për sulmuesin gjirokastrit nuk dihet arsyeja e mungesës dhe në klub nuk gjendet dikush që mund ta thotë.

Dje ka munguar edhe qendërmbrojtësi, Rajmond Shala. Ky i fundit në ndeshjen e kontrollit që ka zhvilluar trajneri Haxhiu në mesjavë, ka qenë i programuar për të qenë në 11-tëshen bazë. Në rast se futbollisti nuk bashkohet me pjesën tjetër të skuadrës në stërvitjen e sotme, atëherë Haxhiu pritet të mendojë për zëvendësimin e tij.

Në takimin ndaj Skraparit, Partizani do të vuajë edhe mungesën e Ishkës, që vazhdon të stërvitet i diferencuar. (Sport Ekspres)